上載日期：28/10/2024

主持：饒文傑(東華三院樂情軒主任)

想像一下，你依家喺一間茶樓飲茶，你前面有一位姨姨推住一架點心車，但入面全部都係你最討厭食嘅點心，咁你會點樣做呢？ 相信你一定唔會理呢架點心車，更加唔會將討厭嘅點心拎落黎，你只會等待一啲你鍾意食嘅點心出現。

係日常生活裡面，總會有啲事情會令我地出現負面嘅想法同感受。就好似酒樓裡面嘅點心車咁，裝載住唔同嘅點心，呢啲點心正正代表住我地唔同嘅想法同感受，有正面有負面嘅。 其實我地可以學習退後一步，觀察住呢架點心車，亦即係我地嘅想法同感受，當令人討厭嘅思想出現時，不必刻意迴避，以開放嘅心態讓佢地出現、停留、離開。好食嘅我地就拎佢落黎，慢慢品嚐☕，學習用依種心態去面對生活，自然會減少被負面情緒困擾嘅機會。